In Mölln hett dat an’n 9. Mai dat 19. Plattdüütsche Autorendrapen geven. Na dat dat 2024 utfallen müss, wieldat de Leitung vun’t Zentrum för Nedderdüütsch in Holsteen (ZfN) nich besett weer, hebbt sik Schrieverslüüd ut ganz Noorddüütschland bannig dorop freut, dat dat nu wedder loosgüng.
Blangenbi en brede Spektrum vun heel ünnerscheedlich Texten geev dat ok en Podiumsdiskussion. Intressant weer dat Gespreek, dat Heiko Thomsen, Marlou Lessing un Jürgen Kropp ünner de Moderatschoon vun Marie Sophie Koop föhrt hebbt. Dorbi güng dat üm de Tokumst vun dat plattdüütsche Book. Jüst in Tieden as hüüt, in de dat Plattdüütsche keen lichten Stand hett, en wichtige Thema. Heel wichtig weren natürlich ok de Gespreke, de een twüschendörch föhren kunn. Rundüm en feine Veranstalten weer düsse Dag in Mölln.
Foto: Thorsten Börnsen