An’n 17. August weer dat LzN bi’n Kinnerdag in’n Börgerpark Bremen. Vun Klock 11 bet Klock 6 hebbt wi den Lütten an uns Stand Platt nögerbrocht.
För düssen Anlaat geev dat ok en männichfolig Programm: Bi’t „Hüppen un Tellen“ un „Deerthüppen“ hebbt wi dat Hüppspeel „Hinke Pinke“ mit plattdüütschen Wöör verbunnen. Dor kunnen de Kinner nich blot de Tallen, sünnern ok Deertnaams op Platt lehren. Den helen Dag sünd de Lütten över den Stand hüppt un hebbt dorför natürlich jümmers en mojen Pries kregen.
Bi uns Woolddeerten-Quiz hebbt de Kinner to’n Bispeel lehrt, wat egentlich en Tuunkruper oder en Ackermann is. För de besünners kreativen Jungs un Deerns geev dat bavento ok wat to’n Lesen un Anmalen mit uns Book „Riemel, Riemel, Rüm“. De Öllern kunnen sik in de Twüschentiet dat grote Anbott an Heften un Broschüren ankieken. För en Klöönsnack weer natürlich ok jümmers Tiet.
Dat weer för uns vun’t LzN en wunnerboren Dag. Wi dankt allen, de rümkamen sünd — besünners den Lütten, de so düchtig mitmaakt hebbt!