An’n 18. un 19. Oktober weer – as in de verleden Johren ok – Martinsmarkt op den Ferienhoff Groneick in Gehrde in’t Artland. Blangen Kunsthandwark, Live-Musik un anner Aktschonen un Vorföhren harr ok dat Lännerzentrum för Nedderdüütsch en Stand. Elke Boggasch vun’t Lännerzentrum harr nich blot en Bült Material op Platt un över Platt dorbi, man ok en Speel för Kinner: en vereenfachte Version vun Hinke-Pinke, bi de de Kinner op den Markt de plattdüütschen Tallen vun Een bet Teihn un de Naams vun Woolddeerten lehren kunnen.
De Lüüd op den Markt harrn düchtig Intress an Platt un an dat Speel, un dat geef veel Uttuusch över Platt. An’n Enn harrn de Besökers all Broschüren mitnahmen. Dat weer wedder en schöne Tiet mit veel Snacks un Spelen op den Martinsmarkt.
(Fotos: Elke Boggasch)