An’n 30. September organiseer dat Lännerzentrum tosamen mit de Bremer Börgerschop en Podiumsdiskuschoon to den Status vun Plattdüütsch un Romanes in’t Land Bremen. Beid Spraken sünd Deel vun de Utstellen „Was heißt hier Minderheit?“, de aktuell in’t Huus vun de Börgerschop to sehn is – Romanes as Minnerheiten- un Platt as Regionalspraak. As Vertreder vun’t Plattdüütsche weren Thorsten Börnsen vun’t Lännerzentrum un Heiko Block vun’t Institut för nedderdüütsche Spraak dorbi. För de Bremer Sinti un Roma weren as offitschell Vertreders Hermann Ernst un Roberto Larze dor. Modereert hett de Diskuschoon Antje Grotheer, de Präsidentsche vun de Bremer Börgerschop.
Heel an’n Anfang geef Andreas Jäger, Linguist an de Uni Bremen, en Impulsvördrag, den sien Themen sik dörch den helen Avend trocken hebbt: He stell mit Bispelen ünnerscheedliche Gefohren för Spraken dor – vun Prestigeverlust bet to en Verbott – un ok Mööglichkeiten, Spraakverlust optohollen. Zentral dorför weren för em dat Bewusstsien, dat all Spraken liekweertig sünd, un vör allens dat Hoochachten vun Spraken un vun spraakliche Veelfoolt.
Na düssen lütten Impuls to Anfang güng dat üm de Situatschoon vun Platt un Romanes kunkret in’t Land Bremen: üm de ünnerscheedliche Geschicht vun de Spraken un de Rutföddern, vor de se staht. Verscheden Oorden vun Ünnerricht spelen en Rull – as private Kursen, man ok as Spraaklehr in Kinnergoorn un School. Un ok dat Medienabott in de Spraken wöör thematiseert: Op Romanes gifft dat nasynchroniseerte Filmen, för Platt speelt Social Media en gröttere Rull. Allens tohoop kann dat aver utbuut warrn, to’n Bispeel kunn dat ja ok Computerspelen op Platt oder Romanes geven.
Ok dat Publikum in’n Saal hett sik flietig an de Diskuschoon bedeeligt un egen Erfahren inbröcht. To’n Bispeel weer ok en junge Sorbe dorbi, de vun de Spraakföddern in de Oberlausitz vertellen kunn. He weer op en sorbsche School un bekunn, wo wichtig Spraakünnerricht in Scholen för dat Lebennigholen vun en Spraak is.
Mit en överraschen, de Spraken verbinnen Perspektiev klüng de Avend ut: Heel an’n Enn güng dat üm en Siedlung vun Sinti in Sleswig-Holsteen, wo ünnerenanner Platt snackt warrt.