Der Schleswig-Holsteinische Landtag, das Ministerium für Allgemeine und Berufliche Bildung, Wissenschaft, Forschung und Kultur sowie der Schleswig-Holsteinische Heimatbund haben am 16. Juli im Kieler Landeshaus die „Emmi för Plattdüütsch“ verliehen.
Für ein selbstgefilmtes Video haben die Schülerinnen und Schüler des Wahlpflichtsunterrichts Plattdeutsch an der Isarnwohld-Schule in Gettorf die Auszeichnung im Bereich Sekundarstufe I erhalten.
Die Laudatio hielt Thorsten Börnsen, Geschäftsführer des Länderzentrums für Niederdeutsch:
„Tim un Lennart sünd de beiden Moderatoren in de Zentraalredaktschoon. Hier loopt de Fadens tosamen, hier warrt News maakt un hier sleit dat Norichten-Hart, un twoors dat för Geddörp. Dat Vörbild is kloor. Nich anners as bi de Kollegen in’t Hamborger Tagesthemenstudio, wo ok jümmers twee Moderatoren togang sünd, löppt dat bi Geddörp’s Ne’e Norichten. Dorbi steiht dat Moderatoren-Team nich alleen – oder beter to tweet. Nee, se hebbt en ganze Nettwark vun Reporterschen un Reporters, op dat se sik verlaten künnt. Un de sünd överall in’t Dörp ünnerwegens, överall dor, wo wat loos is. Un dat sünd teemlich vele Steden. Höört wi mal rin: Dor sünd to’n Bispeel de beiden Korrespondentinnen Eva un Chaja. De hebbt sik de Oortsschiller vörnahmen. Al de sünd en Attraktschoon, denn in dat Dörp twüschen Kiel un Eckernföör sünd se in twee Spraken: Hooch- und Plattdüütsch.
Na en lütte Vörankünnigen warrt wiederschaltet na den Düvelssteen hen. Nu is Steffen an de Reeg. He vertellt de Geschicht, woans de Düvel mit en groten Findling versöcht hett un smieten den Karktoorm twei. Man Gott is dor noch rechtiedig twüschengahn, wenn ok in letzte Minut, dat de Toorm man blots strepen worr – un bet to’n hütigen Dag en lütte Slagsiet hett. (Nu liggt de Findling in de Dörpsmitt un op em sitt de Düvel – ut Bronze.) Dat Heitmatmuseum un de Möhl stellt he bi sien Törn dörch dat Dörp ok glieks noch vör. Korrespondent Momme vertellt wat över den Plattdüütschünnerricht an sien School.
Mandy hett sik plattdüütsche Spreekwöör vörnahmen un verkloort ehr Bedüden.
Un an’t Enn kümmt de Weddervörhersaag, jüst so as bi de Kollegen in Lokstedt. Man hier in dubbelte Besetten.
De WPU Plattdeutsch an de Isarnwohld-Schule hett hier heel wat Besünners op de Been stellt, dücht mi.
Denn:
1. Se hebbt sik en regionale Norichtensennen överleggt un de in en Tageschau-Format sett mit Moderatschoon, Korrespondentennettwark, Wetterbericht un all Drüm un Dran.
2. Se hebbt sik utklamüstert, wat för Themen spannend sünd in’t Dörp un sünd bigahn un hebbt dorut richtige Norichtenbidrääg maakt un de Texten dorför schreven. De sünd intressant, kottwielig, knapp un op den Punkt.
3. Dorbi is dat Geddörp-Team en ganze Barg ünnerscheedlich Saken infullen: Woneem Plattdüütsch sichtbor is in’t Dörp, Geschichten ut de Geschicht un ut de Gegewart, Spreekwöör un de Wedderbericht.
4. Wunnerbor hebbt se dat togang kregen un dat Grote in’t Lütte funnen. Stories mit Norichtenweert ut de Naverschop. Un allens op Platt.
5. Se hebbt dat filmt
6. Un se hebbt den Film sneden.
Un dat allens sülvstännig – un mit richtig veel Swung un Spaaß bi de Arbeit. Dat markst du düssen Bidrag ok bi’t Kieken noch an.
Wat dor binnen steken deit, sünd en Barg Idee, veel Kreativität un ordig Intress an dat egen Dörp un wat dorbinnen passeren deit.
Mehr geiht nich? Mehr geiht doch!
Dormit een aver en rechte Geföhl dorför kriggt, woveel Drifft dorachtersitten deit, mutt een noch weten, dat de ganze Redaktschoon vun de Geddörp Norichten man eerst siet een Johr bi den Wahlplichtünnerricht dorbi is!
Wenn sik dat nich lohnt hett!
Un ansteekt hebbt se annern ok al, as dat utsüht. Denn dat is sacht keen Tofall, dat de negsten „Wahlplichtünnerricht Plattdüütsch“ al 20 mit Deelnehmers starten deit. Dat sünd acht mehr as in den jetztigen Kurs sitten doot.
So maakt Plattdüütsch in’n Ünnerricht Spaaß. Dor künnt sik anner Scholen en Schiev vun afsnieden, dücht mi.
Ik graleer hartlich to de Emmi 2025:
Leni Bohn
Steffen Christiansen
Johannes Boysen
Lenneart Kock
Tim Kruse
Jakob Lorenzen
Mandy Dietrich
Un ehr Lehrerin Andera Wiggert, de hüüt leider krank is un nich sülvst kamen kann.
Un op Letzt is dat j ok en lütt Leevsverkloren an Geddörp, woneem se herkamen doot. Mi dücht, op de Schöler vun de Isarnwohld-School, dor kann sik dat Dörp wat op inbillen.“