Al to’n fieften Mal finnt an’n 18. April in Hamborg de Plattdüütschdag statt. An vele Öörd in de Hansestadt gifft dat denn Programm op Platt. Organiseren deit den helen Dag de Plattdüütschroot Hamborg.
Ok dat Lännerzentrum is mit vun de Partie. In de Zentralbibliothek an’n Hühnerposten kannst Di unse Utstellen „Platt is bunt“ ankieken. Dorbinnen stellt wi Platt mit Comics un Infografiken vör. Dat gifft ok interaktive Elementen so as Radels un Kortfilms.
Babento beedt de Geschäftsföhrer vun’t Lännerzentrum, Thorsten Börnsen, üm Klock 3 ok en plattdütsche Föhren dörch de Binnenstadt an, to de de Deelnehmers sik an’t Raathuus draapt.
Un natürlich gifft dat ok noch en Bült mehr Veranstalten: en Föhren dörch dat Millerntorstadion, Lesen vun Matthias Stührwoldt, Yared Dibaba un Annie Heger un veel mehr.
Dat kumplette Programm finnt Ji op de Homepage vun den Plattdüütschdag ünner: www.platt.hamburg/veranstaltungen/
Foto: Thorsten Börnsen, Lännerzentrum för Nedderdüütsch