Dat Finaal vun Plattbeats, den plattdüütschen Songcontest för Noorddüütschland, finnt düt Johr in Lübeck an’n 21. November statt. Middewiel gifft dat söss Bands un enkelte Musiker*schen, de sik för den Wettbewarv beworven hebbt. Deelwies sünd ehr Bidrääg al op Platt, deelwies mööt se noch översett oder opnahmen warrn. Wi stellt hier de söss Bands un enkelten Musiker*schen vör:
Nie dorbi is Lena Finck-Stoltenberg ut de Proobstie. Se schrifft lichte un ok deepgrünnige Leder op Hoochdüütsch, Engelsch un Plattdüütsch, de to’n Smuustern, man ok to’n Nadenken anreegt. Bi Plattbeats is se mit ehren Song „Weet ji, wat ji wüllt“ över de Söök na dat, wat een würklich will, dorbi. Anhören köönt ji em hier: www.plattbeats.de/band/lena-finck-stoltenberg/
Kommando Pimperle ut Flensborg maakt theatralen Funrock un soorgt dorbi – jüst so as dat Partyspeel, na dat se heet – för Överraschen. Bi Plattbeats maakt se mit ehren Song „Züngel deine Hüte“ mit. Dorbinnen geiht dat üm Spreekwöör un Snackwiesen. En plattdütsche Översetten gifft dat al, nu mutt de Song noch opnahmen warrn.
De veer Musikers vun Commander Nilpfred kaatm ut Bad Oschloe. Se beschrievt ehr egen Musik as Powerpoppunkrock mit Akustikgitarr, un hebbt mit „H2CO3“, so as de Formel al vermoden lett, en Hymne för de Kahlensüür schreven, de jüst översett warrt.
Ut Hamborg is de Band Mementomorium. Se speelt en Mischen ut Nu un Death Metal- Bi Plattbeats sünd se mit ehren Song „Mental Mess“ över Gedankenbiesternis un Wahnsinn dorbi. De Översetten is fardig, nu mööt se noch in den Opnahmruum.
De Hardcorepunk-Band Frevel kümmt ut Bad Sebarg. Ehr Motto is: „Unkommertschell, antifaschistisch un vull op de Snuut!“. Se maakt mit den Song „De Maschien“ mit, de al op Platt översett, man noch nich opnahmen is. Dorbinnen geiht dat üm dat profitdreven Weertschopssystem un siene Utwirken.
Lennon von Seht is en Singer-Songwriter ut Niemünster. He hett al en paarmal bi Plattbeats mitmaakt. Düt Johr is he mit sien Leed „Morgen kann noch töven“ dorbi. Över traditionelle Pickings maalt he mit sien kräftige Stimm Momentopnahmen ut’t Leven.