Al to’n tweten Mal hett dat Lännerzentrum för Nedderdüütsch en Plattkurs för Referendor*schen anbaden. Twischen den 7. un den 10. Mai hebbt alltosamen negen tokümstige Lehrkräft toeerst twee Lehreenheiten to’t Sprakenlehren bi Thorsten Börnsen hatt. Dor hebbt se ok doröver snackt, op welke Wies een Platt in en Vertredenstünn ünnerbringen kann, un plattdüütsche Arbeitsopdrääg kennenlehrt. An’n Sünnavend stünn denn dat Thema „Platt in’n Lehrruum Stadt“ op de Agenda. Toeerst geef dat en heel intressante Stadtföhren op Platt, bi de ok de boren Bremers ut de Grupp noch ni’e Saken lehrt hebbt. Un in’n Ansluss hett de Grupp ünner dat Leid vun Nikos Saul sik Ünnerrichtskunzepten dorför överleggt, op welke Wies een Platt un plattdüütsche Stratennaams in den Ünnerricht vun ünnerscheedliche Schoolfacken integreren kann. Dorbi güng dat ok üm de LzN-Projekten „Plattdeutsch sammeln“ un „Jugend verkloort Platt“.
De Deelnehmer*schen weren sik enig, dat dat nich blot Spaß maakt hett un lehren Platt, man dat dat ok veel Mööglichkeiten gifft, an dat Thema antoknüppen un Platt in’n Ünnerricht to bringen.