Dat Finaal vun Plattbeats, de plattdüütsche Songcontest för heel Noorddüütschland, finnt düt Johr in Lübeck statt, un twoors an’n 21. November. Utricht warrt Plattbeats vun’t Lännerzentrum för Nedderdüütsch. Middewiel hebbt sik ok de eersten Bands beworven, de wi hier kort vörstellen möögt.
Ut de verleden Johren al bekannt is Lennon von Seht. He is en Singer-Songwriter ut Niemünster un düt Johr mit sien Leed „Morgen kann noch töven“ dorbi. Över traditionelle Pickings maalt he mit sien kräftige Stimm Momentopnahmen ut’t Leven.
Ok ut Sleswig-Hoolsteen, nauer: ut Bad Seebarg, kümmt de Hardcorepunk-Band Frevel. Ehr Motto is: „Unkommertschell, antifaschistisch un vull op de Snuut!“, un se maakt mit den Song „De Maschien“ mit. Dorbinnen geiht dat üm de profitdreven Weertschop un ehr Utwirken.
Ut Hamborg is de Band Mementomorium. Se speelt en Mischen ut Nu un Death Metal un hebbt den Song „Mental Mess“ över Gedankenbiesternis un Wahnsinn inreckt.
Ut Bad Oschloe kaamt de veer Musiker vun Commander Nilpfred. Se beschrievt ehr egen Musik as Powerpoppunkrock mit Akustikgitarr, un hebbt mit „H2CO3“, so as de Formel al vermoden lett, en Leed för de Kahlensüür schreven.