Siet den 13. Mai hett de plattdüütsche Bandwettstriet „Plattbeats“ – en Projekt vun’t Lännerzentrum för Nedderdüütsch – en heel nie opsette Websiet. De süht nich blot schier ut, se büdd ok Trüchblicken op de verleden Dörchlööp un Översichtssieten to all Bands, de bet nu mitmaakt hebbt. De Leder, mit de de Bands dorbi weern, kannst Di dor ok anhören un dorto de Texten mitlesen. Finnen kannst de Websiet so as ümmer ünner www.plattbeats.de.
Man de Websiet is nich blots dor to’t Musikhören oder as Dokumentatschon doröver, keen al allens so dorbi weer – Bands köönt sik op de Websiet ok bewarven ünner www.plattbeats.de/mitmachen. Un twoors düt Johr al för de söbente Utgaav vun „Plattbeats“, den plattdüütschen Songcontest för ganz Noorddüütschland. Stattfinnen warrt dat Finaal an’n 21. November in Lübeck.
Keen mitmaken will, mutt ünner 35 Johr olt ween. Wenn de Leder an’n Anfang noch in Engelsch oder Hoochdüütsch sünd, is dat keen Problem – de Plattprofis vun „Plattbeats“ översett de Texten tosamen mit de Bands un öövt de in. Sodat „Plattbeats“ wedder en Stück neger an’t grote Maal kümmt: Jede Band in Noorddüütschland schall tominst een Song op Platt hebben.