In jümmers mehr Kinnergoorns bemööt de Lütten de Regionalspraak Plattdüütsch. Wat dat nu över dat Vörlesen oder Singen löppt, över faste Ritualen in’n Morgenkreis oder över Spraakpaten, de eenmal de Week na’n Kinnergoorn henkaamt, de Kinner warrt wies, dat bi jüm in de Region en twete Spraak tohuus is un lehrt ehr över’t Spelen kennen.
An vele Steden fehlt dat man an plattdüütsche Materialien, de in’n Kinnergoorn bruukt warrn köönt. Dorüm hebbt de Bunnsraat för Nedderdüütsch un dat Nedderdüütschsekretariat 2021 de Praxisbroschüür „Snickemuus un Spaddelkeerl – Plattdüütsch in’n Kinnergoorn“ rutgeven. De Nafraag weer hooch un de druckte Faten gau vergrepen.
Mit Föddermiddel vun dat Ministerium för Wetenschop, Forschen un Kultur vun’t Land Brannenborg kunn nu de twete Oplaag vun „Snickemuus un Spaddelkeerl“ rutgeven warrn, in de ne’e Inhoolden dortokamen sünd: en Kamishibai-Geschicht, dat is en Vertell-Theater ut Japan, dat een allerbest ok för Plattdüütsch bruken kann, Leder, de een mit Bewegens kombineren kann, Spelen för buten un christliche Elementen för den Kinnergoornalldag as Dischspröök oder en Leed.
De Praxisbroschüür döggt för jeedeen, de Kinner mit Platt vertroot maken will – in’n Kinnergoorn oder in de Grundschool, in Speelgruppen oder mit de Kinner oder Enkelkinner. Nich blots de Lütten warrt veel Pläseer hebben bi’t Singen un Spelen op Platt!
De druckte Faten vun de Broschüür kann een bi’t Nedderdüütschsekretariat bestellen, oder as pdf-Datei dalladen. Betahlen mutt een för de Broschüür nix.