An’n 25. Oktober weer wat los! Bi uns ‚Vielstimmig‘-Kunferenz in’t Breemsche Zentrum för Kunst gung dat den Dag üm Musik in europääschen Regional- un Minnerheitenspraken. As besünnern Afsluss hett de Singersche Mayte denn de Regionalspraak Westfreesch in en apentlich Avendkunzert to’n Klingen brocht.
Üm Klock 10 gung dat los mit de Kunferenz. Dor hett sik dat Plenum nich blot över Platt, man verschedene anner lütte Spraken ut Europa uttuuscht. Dorför weren ok verschedene Gäst op Visiet: Onno Falkena ut Nedderland hett wat över de Regionalspraak Westfreesch un den Musikwettstriet ‚Liet International‘ vertellt. Jadwiga Bryckec weer as Middelsfro för Kultur bi’t Projekt ZARI dorbi, dat sik för dat Soorbsche (Lausitz) insett. Leo Virgile ut Friaul (Italien) hett dat Suns-Europe-Festival vörstellt, wo dat üm Musik, Literatur un Films in Regional- un Minnerheitenspraken geiht. Bi’n Impuls vun Bert Kamping weer dat fröhere ‚Drèents Liedtiesfestival‘ Thema, en Songcontest för dat Nedersaksische (Nedderland). LzN-Mitarbeider Nikos Saul hett denn natürlich ok noch den plattdüütschen Songcontest Plattbeats vörstellt.
Na velen intressanten Diskuschonen över de verschedenen Projekten un ok doröver, wat een vunnanner lehren kann, stunn ok de Fraag in’n Ruum, wo en europääsche Kooperatschoon utsehn kunn.
An’n Avend wurr dat denn nocheens richtig musikaalsch: De Singersche Mayte Veenstra un ehr Gitarrist Sander Koning hebbt in en apentlich Avendkunzert op Westfreesch wiest, dat ok lütte Spraken bannig imposant klingen köönt. Mit ehren geföhlvullen Songs hebbt se de Tohörers alltohoop betövert. As een op Westfreesch seggt: ‚Dat wie geweldich!‘
Wi hebbt an den Dag veel lehrt, nette Lüüd kennenlehrt un wunnerbore Musik luustert. Un uns allen dücht: Dat schull nich dat Enn vun de Tohooparbeid ween!
Föddert wurr dat Projekt vun’n Bunnsbeopdraagten för Kultur un Medien.