An’n Sünndag, 13. April, hett dat Lännerzentrum för Nedderdüütsch sien Döör apenmaakt för en besünnere literoorsche Premiere: Fiev plattdüütsche Schrieverslüüd präsenteren ünner den Titel „Poems op Platt“ de Resultaten vun en Schrievprojekt, an dat se al siet 2023 arbeiden doot. Jeden Maand söökt se sik tosamen en Thema ut un schrievt Gedichten dorto. Dat reckt denn vun „Hoorpleeg“ to Themen as „Krieg“ oder „Akustik“.
In de Grupp dorbi sünd Mire Buthmann, Gesche Gloystein, Arne Lentföhr, G. A. Beckman un Nikos Saul. Goot twee Stünnen – mit en Paus – lesen se in de Wahnstuuv-Atmosphäär vun’t LzN ehr Texten. De Besöker vun de Lesen weren deelwies ganz ut Hamborg kamen, üm de literoorsche Premiere to beleven. De Texten, de se to hören kregen, weren nich blot düchtig ünnnerscheedlich, wat de Themen, den Toonfall un de lyrischen Middel angeiht, man dat geef ok noch anner Afwesseln – en paar vun ehr Texten präsenteer Mire Buthmann as Songs mit Gitarr. Na düsse Premiere, de goot annahmen wöör, maakt de Grupp op jeden Fall wieder mit Schrieven un ok mit Vördragen.
