Op dat Bild: De Krink vun den plattdüütschen Klöönschnack. Rechts vörn: de Organisaters Hans un Christa Meinen.
An’n 9. Septembermaand weer dat LzN op Visiet bi’n plattdüütschen Klöönschnack bi de Seefelder Möhl in Stadland-Seefeld. Mitarbeider Joschka von Lienen hett en beten wat vertellt över de Arbeit vun’t LzN un de aktuellen Projekten. Achteran geev dat en intressanten Snack över de verleden Tiet un de Tokumst vun dat Plattdüütsche. Un natürlich hett elkeen noch en Exemplor vun uns „Waldtiere op Platt“-Broschüür mitkregen.
Organiseert warrt de Klöönschnack vun dat Ehpoor Hans un Christa Meinen. De beid penschoneerten Grundschoolmeesters sett sik al lang för de Regionalspraak in un hebbt bi de Seefelder Möhl ok tosamen Plattkursen geven. Siet bummelig söss Johr finnt elkeen tweten Dingsdag in’n Maand üm Klock 7 de plattdüütsche Klöönschnack in’t Möhlencafé statt. Vele Deelnehmers weren sülvst ok bi de Spraakkursen vun dat Ehpoor Meinen dorbi.
Dat weer en heel mojen Avend mit nette Lüüd un spannende Diskuschonen. Wi dankt vun Harten för de Inladen!
Över den plattdüütschen Klöönschnack kann een sik ok hier informeren: seefelder-muehle.de/plattdeutsch-kloenschnack/