Orrig wat los in’t Huus vun de Breemsche Börgerschop: An’n 18. September gaff dat en Konzertlesen mit Musik vun de Hamburger Tüdelband un Slam-Texten vun Thorsten Börnsen. Mit bummelig 120 Lüüd hebbt wi luustert, lacht un Platt to’n Klingen brocht.
Mit ehren „Platt-Pop“ hett dat musikaalsche Duo ut Miriam „Mire“ Buthmann un Malte Müller de Tohörers richtig andreven. Vun experimentellen Kläng mit Elektro-Sounds un Autotune bet to en Akustik-Verschoon vun „Dat du mien Leevsten büst“ weer allens dorbi. Ok ehren nagelne’en Song „De Maschien“ hebbt se präsenteert.
Thorsten Börnsen hett in sien Texten över Situatschonen ut dat Leven snackt, de jeden jichtenswo vertruut sünd. Mit lustigen Vertellsels över de dääglich Rutfödderns bi’t Mülltrennen oder eernsten Texten över verleden Tieden hett he wiest, dat een op Platt allens utdrücken kann.
Dat weer en wunnerboren Avend mit Musik, Literatur un natürlich ok netten Klöönsnack an uns LzN-Infodisch. Wi dankt de Breemsche Börgerschop för de Tohooparbeit un all de Lüüd, de mit dorbi weren.
Op dat Bild: vun links na rechts Thorsten Börnsen, Malte Müller (achtern) un Miriam Buthmann.