Leve Fründinnen un Frünnen vun de plattdüütsche Spraak,
Wiehnachten steiht wedder vör de Döör un dat Johr geiht to Enn. Dorüm wüllt wi en beten torüchkieken op de verleden Maanden un Jo all en schöne Wiehnachtstiet un en gode ni’e Johr 2026 wünschen.
För uns stünn de Anfang vun 2025 heel in’t Teken vun Kattekers un Boomhackers. In’n Januor keem uns Broschüür „Waldtiere op Platt“ rut un de grote Nafraag dorna hett uns jüst so överrascht, as se uns en ganze Tiet op Draff holen hett. Middewiel hebbt wi al de drütte Oplaag drucken laten un goot 14.000 Broschüren ünner de Lüüd bröcht.
To`n Bispeel op uns Veranstalten, de wi 2025 rieklich harrn. Dat güng mit en Lesen vun „Poems op Platt“ in’t Fröhjohr los. Wi hebbt Kursen för Lehrkräft maakt, en Sommerfest fiert, en Konzertlesen mit de Tüdelband un en Diskuschoonsveranstalten över Platt un Romanes organiseert. Bavento kemen Föhren dörch de Börgerschop in Bremen un Besöken in heel Noorddüütschland.
De Harvst wöör den düchtig musikaalsch: In’n Oktober kunnen wi de Kunferenz „Vielstimmig! Kleine Sprachen gar nicht leise“ utrichten. Dor geev dat Vördrääg vun Lüüd to hören, de musikaalsch wat in annere Regional- un Minnerheitenspraken op de Been stellen doot. Achteran kemen de Deelnehmers ut Düütschland, de Nedderlannen un Italien in’n Snack un kunnen gegensiedig vun dat wat mitnehmen, wat de annern vertellen. Wi hebbt dor ok för unsen Wettbewarf Plattbeats düchtig Anregen kregen. In’n November stünn denn dat Plattbeats-Finaal in Lübeck an. Ölven Bands un Solo-Musiker*schen hebbt dat Finaal to en musikaalsch bunten Avend maakt. Vun Ganster-Rap över Hardcore-Metal bet Art-Pop weren heel ünnerscheedliche Slääg vun Musik dorbi. Sodennig kunn een wedder beleven, dat Platt in’t Leven passen deit – ok in dat vun junge Lüüd.
För tokamen Johr hebbt wi uns ok al en Bült vörnahmen un arbeidt jüst an en gröttere Projekt. Dorvun kriegt Ji denn to weten, wenn’t sowiet is.
Nu wünscht wi all uns Frünnen un de Lüüd, mit de wi tosamenarbeidt un de uns Stütt geven doot, ruhige Fierdaag un en gode nie’e Johr 2026!
Hartlich Gröten
Thorsten Börnsen un dat Team vun’t LzN
(Foto: Helenjank, https://pixabay.com/photos/merry-christmas-christmas-5860209/)