Al to’n 33. Mal hett an’n 16. August de Bremer Kinnderdag stattfunnen – un dat LzN weer wedder mit dorbi. Direkt an’n Ingang vun’n Börgerpark hebbt wi an unsen Stand de Lüttjen un ok de Groten mit Mitbringsels un Infos över Platt versorgt. Un ok dat Spelen keem nich to kort: Afsehn vun en Maaldisch harrn wi ok Radels dorbi un – sünnerlich beleeft – twee Hüppspelen opbuut: Hinkepinke mit plattdüütsche Tallen un mit plattdüütsche Deertennaams. So kunnen all, de mitmaakt hebbt, pläseerlik un mit veel Höög plattdüütsche Wöör kennenlehren. För gor nich so wenig Kinner weer dat dat eerste Mal, dat se Platt bemött sünd. Wenn wi so de spraakliche Veelfalt vun Noorddüütschland noch kunniger maken köönt, freut uns dat natürlich besünners.
Un ok de Öllern kunnen sik an den Stand mit Hölp vun unse Broschüren över Platt informeren un mit uns in’n Snack kamen. Dat weer en heel schöne Veranstalten mit vele höögliche Bemötens un vele neeschierige Kinner. Velen Dank an all, de dorbi weren, an den Lannsbedriefssportverband Bremen för de Organisatschoon un besünners an de Lüttjen, de düchtig mitmaakt hebbt.
Fotos: LzN