Plattbeats, de plattdüütsche Songcontest för heel Noorddüütschland, de vun’t Lännerzentrum för Nedderdüütsch utricht warrt, geiht düt Johr in de achte Runn. Stattfinnen warrt dat Finaal an’n 14. November in Rostock, un bewarven köönt sik Musikers un Bands ünner 35 noch bet to’n 20. Oktober. De eersten fiev Bewarvers stellt wi op de folgen Siet vör. Mehr över jüm gifft dat to lesen op plattbeats.de.
De Band Blomenkamp is ut Hamborg un maakt drieven Indie-Musik. In ehr Texten befaat se sik mit de Absurditäten vun’n Alldag un mit perfekschoneerte Fehlslääg. Bi Plattbeats sünd se mit ehren Song „Sinn“ dorbi.
Levin Strehlow, en junge Musiker ut Rostock, verpackt geern alldaagsche Saken in Lyrik un ünnermaalt ehr mit sien Musik. De is mal luut un snell, man tomehrst ruhig un utspannt. Bi Plattbeats maakt he mit en plattdüütsche Faten vun sien Song „Zwischen den Seen“ mit.
Martin Lauló is Singer, Gitarrist un Songwriter vun de Band El Andaluz ut Wolfenbüttel. Gliektiedig is he ok Solo ünnerwegens, dor mit en reduzeerten, intimeren musikaalschen Ansatz. För Plattbeats hett he en Song op Platt opnahmen: „Lögen“.
Sardine is en Hamborger Band, de siet Anfang 2025 besteiht. De Sänger Levin is op de Nordseeinsel Pellworm opwussen, wo he as eerste Spraak Platt lehrt hett. Siet goot een un en halve Johr mischt Sardine nu in de Hamorger Musikszeen mit, an’t Enn vun’t Johr warrt ehr Debüt „Plattrock“ rutkamen. Bi Plattbeats sünd se mit den Song „Beck“ dorbi.
Ze June ut Hamborg verbinnt meloodschen Rock mit atmospäärsche Kläng, emotschonale Melodien un den besünnern Sound vun ehr Ukulele. Dorbi suert en Mischen rut, de toglieks rockig, spelig un persönlich is. För Plattbeats nimmt se en plattdüütsche Version vun ehren Song „Try to be yourself“ op.
Foto 1: Blomenkamp; Foto 2: Levin Strehlow; Foto 3: Martin Lauló; Foto 4: Sardine; Foto 5: Ze June