Orrig vele plattdüütsche Veranstalten geef dat in de verleden Week. Bi dree dorvun weer de Geschäftsföhrer vun’t LzN, Thorsten Börnsen, dorbi un kunn beleven, wo veelfolig dat plattdüütsche Kulturleven in Noorddüütschland is.
Vun’n 17. bet to’n 20. September geev dat dat Platt Satt Festival mit en ganzen Barg Veranstalten dörch dat hele Emsland dörch. Optakt weer dat Theaterstück „Wellness in’n Kohstall“ vun dat Franziskusgymnasium in Lingen, dat LzN mit dorbi. Schöler ut den 13. Johrgang hebbt sik düsse Kumedi sülvst utdacht un op de Bühn bröcht. Dat is ok dorwegen wat Besünners, wieldat dat Franziskusgymnasium as eerste Gymnasium as Plattdüütsche School in Neddersassen utteken woor.
Gliek den annern Dag güng dat in de Lümborger Heid, denn in Bämsen funn de 78. Nedderdüütsche Dichter-Dagfohrt statt. De stünn düt Johr ünner dat Motto „Plattdüütsche Literatur – Allens blots Idyll?“. Vele verbinnt mit plattdüütsch Literatur blots noch lustig lütt Vertellens un Döntjes. Dat dat ok ganz anners utsehn kann, hebbt glieks to Anfang Ulrike Stern vun’t Kompetenzzentrum Nedderdüütschdidaktik in Griepswold un Marianne Ehlers bewiest. Se hebbt Texten leest ünner annern vun Susanne Bliemel un Johann Dietrich Bellmann. Över dat hele Wekenenn güng dat denn üm literarisch Warken, de en anner Bild vun plattdüütsch Literatur wiesen doot, as dat siede, wat intwüschen so begäng worrn is in de plattdüütsche Welt.
De 19. September stünn denn ganz in’t Teken vun dat 100-johrige Jubiläum vun de Fritz-Reuter-Bühn in Swerin. Startschööt för en ganze Reeg vun Veranstalten in düt Johr weer dat Opmaken vun de Utstellen „Vörhang up! – 100 Jahre Fritz-Reuter-Bühne“. Ok hier weer dat LzN mit vun de Partie, as blangenbi annern Parlamentspräsidentin Birgit Hesse un Finanzminister Heiko Geue dat Band dörsneden hebbt. De Utstellen is en spannen Tietreis dörch 100 Johr bewegte Geschicht vun en rutragen plattdüütsche Bühn.
(Fotos: Thorsten Börnsen)