To’t Börgerfest för den Dag vun de düütsche Eenheit weer dat Wekenenn in Bremen orrig wat los. Vun Freedag bet Sünndag weer ok dat LzN an de Slachte mit en Stand vertreden.
An uns Wöör- un Wunschboom kunnen Besökers ehre leefsten Wöör op Platt wiesen, un opschrieven, wat se sik för de Spraak noch wünscht. Bi en Winstspeel geev dat denn noch richtig wat to winnen – vun plattdüütsche Lehrböker und Onlinekursen bet to en plattdüütsche Kaffeemischen. Natürlich weer denn ok noch Tiet för Klöönsnack.
Wi dankt de Lüüd, de düt Fest mööglich maakt hebbt. Un natürlich ok de Lüüd, de uns so düchtig an uns Stand ünnerstütt hebbt.
