Al to’n 25. Mal hett de Lümborgsche Landschopsverband an’n 8. Oktober den Schoolmesterdag utricht, düt Mal in dat Frielichtmuseum an’n Kiekebarg. Na en kommodige Ankamen mit Kaffee begünn de Dag mit Begröten vun de Deelnehmers dörch de stellvertreden Landraatsche Anette Randt, den Museumsbaas Stefan Zimmermann, de Geschäftsföhrersche vun den Lümborgschen Landschopsverband Anne Denecke un de Fackberadersche för de Landkreisen Lümborg, Heidkreis un Harborg Wiebke Erdtmann.
Achteran güng dat direktemang in de Workshops. Hans-Hinrich Kahrs bood en Kurs to’t Theaterspelen an, un Nikos Saul vun’t Lännerzentrum för Nedderdüütsch leid en Warkkoppel, bi de dat üm’t kreative Schrieven op Platt güng. De Geschäftsföhrer vun’t Lännerzentrum, Thorsten Börnsen, harr in de Twüschentiet al en Stand mit Broschüren un Flyers torecht un kunn in de Paus en ganzen Barg dorvun ünner de Lüüd bringen. Sünnerlich de „Waldtiere op Platt“ stell sik ok op den Kiekebarg as Duerbrenner rut. Dat Malbook för de Lütten „Riemel Riemel Rüm“ müss sik dorachter nich versteken. Un jüst so wichtig weer natürlich de Klöönsnack mit de Deelnehmers, vun de wi vele ja al lang kennen doot.
An’n Namiddag güng dat eerst mit twee Rundleids dör dat Museum wieder, denn klung de Dag behaaglich ut bi Kaffee un Koken un Vördrääg vun Heiko Frese över ni’e plattdüütsche Bökers un vun Wiebke Erdtmann över ehrenamtliche Engagement för Platt an Scholen.
Foto: LzN