Jedeen Johr kann een in’n Noorden vun’n Landkreis Ossenbrüch bi’n Martinsmarkt in Gehrde allerhand beleven. Twischen Keramik, Smuck un Leckereen kunnen Besökers ok bi den Stand vun’t LzN op en Klöönsnack rinkieken un bavento wat över Platt lehren. LzN-Mitarbeidersche Elke Boggasch harr ok unsen plattdüütschen Wöör- un Wunschboom dorbi. Dor hebbt de Lüüd ehre leefsten plattdüütschen Wöör anbammelt. Wunnerbor, wat dor wedder allens tosamenkamen is, jüst an Wöör vun dat regionale Platt ut’t Ossenbrügger Land. Butendem geef dat en Winnspeel, wo de Deelnehmers en Kaffeemischen, uns „Snacken, Proten, Kören“-Book, en Platt-Onlinekurs oder dat plattdüütsche Konversatschoonshandbook vun Hannes Frahm un Olaf Wolkenhauer winnen kunnen. Dat weer wedder en heel schöne Veranstalten!
