Klookluustert, de plattdüütsche Podcast över Wetenschop un Sellschop, etableert sik mehr un mehr. Een Johr gifft dat den Gesprääks-Podcast vun’t Nedderdüütschsekretariat nu al un middewiel is de drütte Reeg online gahn. Wielt in de twete Reeg dat Böverthema „Politik för Platt“ weer, richt sik de Themen nu wedder mehr op Weten- un Sellschop ut – dat Motto is „Duersamkeit“. Dat is en bannig groot Rebeet un nich all Facetten dorvun köönt in man fief Stremels afdeckt warrn. De fief verscheden Themen geevt en Inblick, wat allens to Duersamkeit dorto hören kann. Los geiht dat mit dat immateriell Kulturarv „Knick“ in Sleswig-Holsteen un wat dat dormit op sik hett. Denn waagt klookluustert en Blick in de Psychologie: Woans köönt wi uns Resilienz in’n Alldag verbetern? Man ok Ümwelt is en heel groten Fakter vun Duersamkeit, vundeswegen geiht dat eenmal dorüm, woans een mit Ressourcen duersamer ümgahn kann, wat egens negative Ümweltnaklappen vun’n Tourismus ween köönt un wat een dorgegen maken kann. Un denn warrt noch de Verkehrswenn belücht – wat kann jeedeen hier doon, un wat schull de Staat maken?
Wenn di düsse Themen intresseren doot, denn luuster geern in den Podcast rin un warr kloker. Ok de drütte Reeg to „Duersamkeit“ schall to den Utbo vun de Spraak bidregen. Sünnerlich bi Themen ut de Wetenschop fehlt de Wöör op Platt an vele Steden. Vundor is dat wichtig, dat wi hier passliche Begrepen finnen doot. Dör de Arbeit an‘n Podcast sünd en Reeg Vörslääg bi rutsuert, de bi de SASS-Redakschoon inlangt warrn schüllt (https://netz.sass-platt.de).
Dat Nedderdüütschsekretariat wünscht veel Pläseer bi’t Klookluustern! Du kannst klookluustert överall dor hören, wo dat Podcasts gifft. Wenn du Fragen un Trüchmellens hest, schriev uns geern an info@niederdeutschsekretariat.de!
Spotify: https://podcasters.spotify.com/pod/show/niederdeutschsekretariat
Apple Podcast: https://podcasts.apple.com/us/podcast/klookluustert/id1728070692
YouTube: https://www.youtube.com/channel/UC0wywpJze-j6a5SBd4e_M9A
Stütt geven för dat Projekt hett de Beopdraagte vun de Bunnsregeren för Kultur un Medien (BKM).
Grafik: Niederdeutschsekretariat