Fix wat loos weer bi de eerste Föhren dörch dat Huus vun de Breemsche Börgerschop op Platt. An’n 11. Februar weren wi mit 23 Deelnehmers dörch dat Bremer Parlament ünnerwegens. Un dorbi hett sik wedder rutstellt, dat een ok över Politik, Kunst un Kultur wunnerbor op Platt snacken kann. De negste Termin is an’n 1. April, üm Klock fief (17:00 Uhr). Anmellen kann een sik noch ünner besuch@buergerschaft.bremen.de. Terminen un mehr Infos finnt een hier: www.bremische-buergerschaft.de/index.php?id=94.
Bremen hett en lange parlamentoorsche Geschicht, de bet in’t Fröhmiddelöller torüchgeiht. Dormals hebbt se in den Bremer Rat Platt snackt. Vundaag is de Spraak, in de de Börgerschop normalerwies daagt, Hoochdüütsch, man se föhlt sik Platt ümmer noch verbunnen. Dorüm beedt dat Lännerzentrum för Nedderdüütsch in Kooperatschoon mit de Börgerschop nu al twee Manden Föhrens op Platt an.
De Lüüd, de an de Föhrens deelnehmt, köönt den Oort vun de Lannespolitik so op ni’e Wies beleven – oder villicht ok to’n eersten Mal – beleven. As de Buu 1966 opmaakt wöör, is he noch kontrovers diskuteert worrn. Nu gellt he as en Tüügnis vun laatmoderne Architektur, den sien Bedüden wiet över de Region rutreckt.
Thorsten Börnsen, de dat Leid vun’t Lännerzentrum hett un ok de Föhrens anbeedt, freut sik över de Tosamenarbeit mit de Börgerschop: „Op düsse Wies warrt Platt in Bremen an mehr Öörd sichtbor. Un so köönt wi ok de Bremerinnen un Bremer ehr Lannesparlament negerbringen.“