Leve Fründinnen un Frünnen vun’t Plattdüütsche,
nu, wo 2024 nich mehr al to lang duern warrt un 2025 al vör de Döör steiht, wüllt wi en beten torüchkieken op verleden Johr.
Toeerst güng in’n Dezember 2023 uns plattdüütsche Landkoort „plattdeutsch-sammeln.de“ online. Dor kann jeedeen plattdüütsche Fundstücken indragen so as Stratennaams, Inschriften oder Gebüden mit plattdüütsche Betöög. Middewiel hebbt vele Lüüd tosamen al en poor hunnert Indrääg sammelt. Un de reckt nu vun Brasilien bet na Estland.
En wichtige Deel vun uns Arbeit in 2024 weer dat, in’t un buten dat Lännerzentrum Veranstalten op de Been to stellen un Platt ünner de Lüüd to bringen. Siet April finnt ümmer an’n drütten Middeweken in’n Maand de plattdüütsche Singkring „Wi singt op Platt“ in de Rüüms vun’t Lännerzentrum statt. Dat Leid hett de Musiker David (Fidi) Bär. Un üm Reklaam för Plattdüütsch to maken, weren wi ok in de veer Bunnslänner mit uns Material ünnerwegens. Uns Mitarbeidersche Elke Boggasch weer to’n Bispeel op de Plattdüütsche Bökermess in Hamborg, in’t Kiekebarg-Museum un op den Martinsmarkt in Gehrde. En nie’e Format hebbt wi ok entwickelt: Wi bringt Platt mang Kantüffeln un Rode Beet op Wekenmarkten ünner de Lüüd. Sodennig weren wi 2024 dormit in Bremen-Findörp, in Lümborg un in Heid. En Barg positive Trüchmellen un nette Snacks geev dat – dormit maakt wi op jeden Fall tokamen Johr wieder.
An’n 22. Juni hebbt wi in’t LzN denn en schöne Sommerfest fiert. Bummelig 60 Lüüd weren to Besöök in de Contrescarpe un hebbt mit David (Fidi) Bär plattdüütsche Leder sungen un Slam-Texten vun Gesche Gloystein un vun unsen Mitarbeider Nikos Saul höört. Düsse Veranstalten hett uns düchtig Spaaß maakt. Un sodennig wüllt wi tokamen Johr in‘t Lännerzentrum för noch mehr kulturelle Veranstalten op de Been stellen.
Düchtig musikaalsch güng dat bi uns in’n Dezember to. Toeerst geev dat en Workshop mit Musiker*schen ut Düütschland un de Nedderland. De hebbt tosamen en Leed op Platt un Nedersaksisch, de nedderdüütsche Dialekt in’t ööstliche Nedderland, schreven un opnahmen. Platt verbinnt ok över Lännergrenzen weg. Un an’t Enn vun’n Dezember funn denn dat Finaal vun unsen plattdüütschen Songcontest Plattbeats in Bremen statt. Ölven Bands un enkelte Musiker*schen hebbt dor Leder op Platt speelt, un de Bremer Börgermeister hett to’n Optakt wat rappt. En lebennige Avend weer dat in’t Bremer Zentrum für Kunst, de wiest hett, dat Plattdüütsch en Platz hebben kann in de Jugendkultur.
Nu wünscht wi all uns Frünnen un de Lüüd, mit de wi tosamenarbeiden un de uns Stütt geven doot, ruhige Fierdaag un en gode nie’e Johr 2025!
Hartliche Gröten vun
Thorsten Börnsen un dat Team vun’t LzN
(Foto: TanteTati, https://pixabay.com/photos/christmas-tree-fir-tree-4704703/)