De Carl-Toepfer-Stiften Hamborg un de Plattdüütsch Stiften Sleswig-Holsteen hebbt de ni’en Böker vun Clivia Appeldorn föddert. Un dat sünd nich blots twee Böker, se sünd sülvst Deel vun en ganze Paket, dat sik an Kinner in Kinnergoorns richten deit: Dat Anni-Muus-Projekt.
Dorto höört toerst mal en tweesprakige Billerbook: „Bi Anni Muus tohuus“. Dat laadt de Kinner dorto in, mal in en Muuslock op Besöök to kamen. De Schrieversche schrifft över dat Book: „De Kinner loopt vun Stuuv to Stuuv, kriegt to weten, woans so en lütte Muus leevt un lehrt blangenbi de eersten Wöör op Platt. Lütte Fragen as „Finnst du en Pann un finnst du en Putt?“ maakt dat Book kottwielig, so dat keen Langewiel opkamen kann. Dat Billerbook is farvenfroh illustreert un höllt so mancheen Överraschen praat.“
De twete Deel vun dat Anni-Muus-Paket is en Book mit Radels un Opgaven to’n Mitmaken. Dorto schrifft Clivia Appeldorn: „Hier kann dat Kind mit Hölp vun Anni un ehr lütten Frünnen as Bernd de Brummer, Serafina Spinn… to’n Bispeel Farven un Tallen lehren. Dat Kind kann Annis Schunkelstohl anmalen, dörch Labyrinthe lopen un tohöörige Schaddenbiller vun Annis Frünnen söken. Dorto lehrt dat Kind spelersch, in wat för en richtige Reeg een Sünnenbloomkaarn plant warrt un wat doröver rut för de Plant wichtig is.“
Dormit de Böker goot in’n Kinnergoorn to bruken sünd, gifft dat ok noch en Handpopp. Se is um un bi 40 cm groot un is heel un deel ut Bio-Boomwull un Bio-Plüsch maakt.
Böker as ok Handpoppen köönt vun Kinnergoorns jüst so köfft warrn as ok vun Privatpersonen. För Bestellen as ok Informatschonen oder Fragen könnt Lüüd sik mellen ünner: anni-muus@web.de.
Mehr Infos gifft dat ok bi den Verlag: https://www.isensee.de/product/bi-anni-muus-tohuus/.