In düsse Week is de Biraat för Nedderdüütsch ut Sleswig-Holsteen op Besöök bi den Biraat Nedderdüütsch in Bremen west. In beid Länner warrt Platt snackt, beid Länner sünd mit dat Lännerzentrum för Nedderdüütsch, anner Institutschonen un all de Lüüd, de sik för de Spraak insetten doot, op’n gooden Weg. „Ich freue mich nicht nur, wieder in meiner Heimatstadt zu sein, sondern bedanke mich vor allem für diese tolle Gelegenheit, die Gremien miteinander tagen zu lassen und freue mich auf einen lebendigen Austausch“, sä de Kieler Landdagspräsidentin, Kristina Herbst. Bi de gemeensame Sitten gung dat um Uttuusch, Strategien un Bispelen för dat Bewahren un Utboen vun dat Plattdüütsche.
Thorsten Börnsen vun dat Lännerzentrum för Nedderdüütsch hett de Grupp vör de Sitten noch dör de Bremische Börgerschop föhrt. Dorbi hebbt nich blots de Besökers ut Kiel en Barg to weten kregen över dat Boowark un de Geschicht vun de Börgerschop.
An’n Dingsdag hebbt de Gäste en Stadtförung mit StattReisen Bremen dör de Bremer Altstadt mitmaakt un later ok bi dat Lännerzentrum för Nedderdüütsch an de Contrescarpe rinkeken un sik över de Arbeit un aktuelle Projekte vun dat LzN informeert. „Düsse Drepen sünd bannig wichtig för uns – för den Uttuusch un de gemeensame Arbeit för de gemeensame Saak“, freit sik Geschäftsföhrer Thorsten Börnsen över den Besöök.
Besten Dank an de Bremische Börgerschop, Landdagspräsidentin Antje Grotheer un de beid Birööt!