Platt tosamen: Musikers ut Düütschland un Nedderland nehmt in Bremen en Song op Platt op

Platt warrt nich blot in Noorddüütschland snackt, man ok in de westlichen nedderlandschen Provinzen. Dor nöömt se de Spraak Nedersaksisch. Wiel Platt op düsse Wies Minschen ok över Lännergrenzen weg verbinnen deit, hett dat Lännerzentrum för Nedderdüütsch vun den 8. bet to’n 10. November in Bremen en Workshop mit Lüüd ut Düütschland un Nedderland dörchföhrt, de Musik maakt un Texten schrievt. Dat Maal dorbi weer, en Song op Plattdüütsch un Nedersaksisch optonehmen. Ut Düütschland weren Mire Buthmann un Malte Müller vun de Tüdelband ut Hamborg dorbi, un ut Niemönster keem Lennon von Seht. Ut de Nedderland sünd Erik Koerts, Dion Bouwes, Gijs-Peter Kuipers un Ruud Hermans na Bremen föhrt.

In dree arbeitsrieke Daag in’n Zentrum für Kunst in Bremen-Woltmershusen hebbt de Deelnehmers denn nich blot en Song tosamen schreven un opnahmen, Frank Unsinn ut Hamborg hett ok en Musikvideo dreiht. Afmischt un sneden is denn allens an’n Anfang vun tokamen Johr, man eerste Resulaten warrt dat al in de Jurypaus vun’n Plattbeats-Finale an’n 23. November to hören geven.  

All Biller: Thorsten Börnsen