(Foto: De Priesdregers mit Maten vun de Rottendorf-Stiften un ehr Gremien; maakt hett dat Bild Ute Saul)
Middeweken, den 9. Okober, weer dat so wiet, un de Verlehen vun den Rottendorf-Pries för Verdeensten üm de nedderdüütsche Spraak in Westfalen funn statt op dat Kulturgut Haus Nottbeck in’t süüdööstliche Mönsterland. Op düt Kulturgut befinnt sik nich blot en fiene Saal för Veranstalten, man ok dat westfäälsche Literaturmuseum. Passlich to düsse Naverschop hebbt de Priesdräger ehr Priesen för en grote Wöörbook un för en Film na en plattdüütsche Book vun Augustin Wibbelt kregen.
Den Hauptpries geev dat düt Johr för Robert Damme. He hett dat Westfäälsche Wöörbook, den siene Geschicht al in de 1920er Johren anfüng, 2021 to Enn föhrt un in siene Amtstiet as Mitarbeider bi’t Wöörbook veer vun fief Bänn rutbröcht. Möglich wöör dat dörch dat Gauerwarrn bi de Arbeitsprozessen un de enge Inbinnen vun studentsche Mitabeider*schen. In en kortwielig Interview dörch Georg Bühren, den Vörsitter vun den Rottendorf-Utschuss, vertell Robert Damme mit Hölp vun Fotos ut sien Leven: vun sien Opwassen bi Bielefeld un sien fröhe Vermaak för Spraken, vun sien eher tofällige Anfäng in de Germanistik, dat he kort dorvör stünn, Bibelöversetter to warrn, un dorvun, wo veel Freetiet he offert hett, üm dat Wöörbook fardig to kregen. Ok üm siene Marathonlööp güng dat un op welke Wies ok bi’t Westfäälsche Wöörbook Utduer nödig weer.
Mi den Sünnerpries wöör de Filmgrupp „wenndienaturnichwill“ uttekent, to de Hein Köhler, Dominic Stermann, Henning Wirtz un Nikos Saul höört, de ok bi’t Lännerzentrum arbeiden deit. Se hebbt 2022 en plattdüütschen Western mit den Titel „Wild Wild Westfalen“ dreiht. Inspireert sünd se dorbi vun dat Book „De Strunz“ vun Augustin Wibbelt vun 1902 woorn. De Film speelt in de 1870er Johren in’t Mönsterland. Dormals wöör dat Mineral Strontianit dor afbuut un dat geev Tostänn as bi dat amerikaansche Goldfever, blot en beten lütter. Wat passt dor beter as dat Thema in en Western to verarbeiden? Bi de Priesverlehen wöör de Film eerst eenmal wiest, denn hebbt Nikos Saul un Henning Wirtz in en Interview mit Markus Köster vun dat LWL-Medienzentrum vun den Produktschonsprozess un de deelwies swaren Dreiharbeiden vertellt, man ok, wo goot sik an’n Enn allens föögt hett. Ankieken kann een den Film op den Youtubekanel vun dat LWL-Medienzentrum:
Na en Middagsimbiss füng Deel twee vun de Veranstalten an. Nu güng dat üm en ni’e Homepage över nedderdüütsche Literatur in Westfalen un dat nedderdüütsche Wark vun den Mann, na den de Rottendorf-Pries benöömt is: den Pharmafabrikanten un plattdüütschen Schriever Andreas J. Rottendorf. Walter Gödden, de de Utstellen över Andras J. Rottendorf in’t Westfäälsche Literaturmuseum kurateert un de Texten för de Homepage schreven hett, stell düsse Homepage vör. Ünner de Adress https://niederdeutsch-westfalen.de/ finnt een nu Infos to plattdüütsche Schrieverslüüd ut Westfalen un ok en Terminkalenner mit aktuelle plattdüütsche Veranstalten in Westfalen un döröver rut. Achteran wöör noch en Film över Andreas un Rose Rottendorf wiest un dat geef en Rundgang dörch de Utstellen. Ankieken kann een sik den Film hier: https://niederdeutsch-westfalen.de/de-stifters/filmdokumentation-ueber-die-stifterfamilie
De Veranstalten weer heel un deel kortwielig un möök kloor, wo vele Aktivitäten un Inithschativen dat aktuell to Platt in Westfalen geven deit.