Orrig wat los op de Theaterbühn in Süderhastedt in Dithmarschen. De Goorn vun’t Pastorat hett sik in en Festwisch verwannelt. Getränken un Braadwust gifft dat to köpen un merrnmang steiht de grote Bühn.
Meist dat ganze Dörp is kamen un kieken sik foorts twee Theateropföhren an. Eerstmal sünd „de Lütten“ an de Reeg mit en Stück över en Gespensterinternat, dat in Unroh kümmt, wieldat de Opsichtsbehöörd för Spöken sik kottfristig to’t Nakieken anseggt hett. Un so richtig liekut löppt dat nich in dat grote Huus för de jungen Gespenster.
Dat twete Stück speelt in en Sanatorium, woneem sik en ganze Reeg wunnerliche Lüüd ansammelt hebbt. Un dat sorgt för düchtig Wirbel. Goot ünnerhollen hett sik dat Publikum un Thorsten Börnsen vun’t LzN.
Afsehn dorvun hebbt wi wedder markt, dat plattdüütsch Theater öftmals veel mehr is as en Stück un sien Tokiekers. Mennichmal is dat ok en gemeensam Dörpsprojekt, dat de Lüüd mit’nanner verbinnen deit.
Fotos: Thorsten Börnsen