An’n Sünnavend, 20. Juni, weer dat wedder so wiet un dat Lännerzentrum för Nedderdüütsch hett för sien Sommerfest de Dören apenmaakt. An dat bet nu hittste Wekenenn vun düt Johr weer dat in de Rüüms in de Contrescarpe hööglich köhlig. Jüst as in de verleden Johren ok geef dat afsehn vun Eten, Drinken un en Reeg to Snacken ok wedder en Literatur- un Musikprogramm.
Düt Johr hett Lennon von Seht ut Niemönster dat Publikum mit egen Leder as „Ledermakerleven“, man ok mit plattdüütsche Klassikers as „Dat du mien Leevsten büst“ to’n Mitsingen bröcht. Wilko Lücht ut Ollenborg harr woortspeelrieke Texten dorbi, in de blangen en Regionalkrimischriever ok Klosterfrau Melissengeist un en Figur ut de greeksche Mythologie wichtige Rullen spelen. Un Nikos Saul, Mitarbeider bi’t LzN, hett en paar Gedichten över den Sommer un lerrige Ladens in Footgängerzonen vördragen. Wokeen sülvst Platt lehren wull, harr dorto de Mööglichkeit bi twee Crash-Kursen, de Thorsten Börnsen, Geschäftsföhrer vun’t Lännerzentrum, anbaden hett. Mit all de Lüüd, de op Besöök weren, weer dat en düchtig schönen Namiddag.
