För de föffte Reeg vun den plattdüütschen Podcast klookluustert weer dat Nedderdüütschsekratariat mal wedder op Törn. Dree Moderaters hebbt sik mit verschedenen Aspekten vun’t Thema Plattdüütsch in de Nutiet befaat. De Anlaat: An’n 1. Dezember warrt künnig maakt, wat bi de Ünnersöken Nedderdüütsch 2026 rutsuert is. Dor geiht dat dorüm, wo de Stand vun de Spraak vundaag is.
In den eersten Stremel geiht Christoph Ahlers de Fraag na, woans dat üm de plattdüütsche Spraak opstünns steiht. He kickt, wat bi de verleden Ümfraag vör 10 Johr rukamen is un verkloort, woso dat so wichtig is, dat 2026 en ne’e Ümfraag dörchföhrt worrn is. Op sien Törn is Christoph verscheden Lüüd bemött: He hett mit Vertreders:schen vun nedderdüütsche Institutschonen snackt, mit Lüüd ut de Sprekergrupp un ok mit Minschen, de to de Mehrheitssellschop höört un vun buten op de Spraak kieken doot. Ok as Gast dorbi: Thorsten Börnsen, Baas vun’t Lännerzentrum för Nedderdüütsch.
In den tweten Stremel sett sik Benita Brunnert dormit uteneen, woans dat mit de Spraak in de ne’en Medien utsüht, un fraagt na, woans dat üm moderne Literatur op Platt steiht. Ok se hett mit Vertreders:schen vun plattdüütsche Institutschonen snackt, jüst so mit jüngere Lüüd, de sik op Social Media för de Spraak insetten doot. Se wull weten, wat se vun de plattdüütschen Anbotten in de ne’en Medien hoolt un wat de Institutschonen för junge Lüüd anbeden doot. Un ok to dat Thema plattdüütsche Literatur hett Benita verscheden Sichtwiesen tosamendragen. Ok LzN-Mitarbeider Nikos Saul stellt sik dor as Schrieversmann un Poetry Slammer vör.
In den drütten Stremel befaat sik Lina Martschin mit den olen Mythos vun de Moddermelk: Plattdüütsch mutt een vun Huus ut mitkregen hebben, anners warrt dat so un so nix mit de Spraak. Is dat würklich so? Dor snackt se mit New Speakers över, also Lüüd, de Platt later in’t Leven lehrt hebbt. Woans hebbt se dat maakt, wat weer ehr Motivatschoon un wat sünd Rutfödderns bi’t Lehren. Un denn stellt sik natürlich de Fraag, woans dat bi Native Speakers ankümmt. Un opletzt: Woneem kummt düsse Mythos egens her?
klookluustert kann een överall dor hören, wo dat Podcasts gifft. Stremel 1 is nu al online. Stremel 2 kümmt denn an’n 13.11. un Stremel 3 an’n 27.11.2026 rut. Mehr Informatschonen gifft dat bavento op de Siet vun’t Nedderdüütschsekretariat. Bi Fragen un Trüchmellens kann een sik ok an info@niederdeutschsekretariat.de wennen.
Bild: © Nedderdüütschsekretariat