In de verleden Week harren wi in’t LzN wedder Referendor*innen ut Bremen to Gast. Ut dat Anbott vun Wahlplichtkursen kunnen sik de tokümstigen Lehrer*innen ok „Plattdeutsch in der Vertretungsstunde und im außerschulischen Lernraum Stadt“ utsöken. Düt Mal weer de Kurs mit 14 Deelnehmers besünners goot besöökt.
Bi Kaffee, Tee un Keksen geef dat an twee Daag en lütten Crashkurs Platt un Ünnerrichtsmaterialien vun Thorsten Börnsen, den Geschäftsföhrer vun’n LzN. An’t Wekenenn stünn en Stadtföhren mit Swaarpunkt op Platt in’n apentlichen Ruum op’t Programm. Achteran hebbt de Deelnehmers ünner dat Leid vun Nikos Saul, Mitarbeider bi’t LzN, doröver nadacht, op welke Wies se de Themen Plattdüütsch un Platt in de Stadt in ehren Fackünnerricht mit inbinnen köönt. Vele gode Ideen sünd dorbi sammelt worrn – vun mehrsprakige Listen mit Wöör för Handwarkstüüg in’n Beropsünnerricht bet to’t Behanneln vun de Hanse un den Spröök „Buten un binnen, wagen un winnen“ op den Bremer Schütting in Weertschop un Politik.
An’n Enn kunnen all Referendor*innen in den Kurs Platt verstahn un ok tominnst en beten snacken un hebbt Ideen för ehren Ünnerricht mit na Huus nahmen. En plattdüütsche Druckbetanken, de ok noch Spaaß maakt hett!
