Verleden Freedag geev dat düchtig wat to fiern in’t Huus vun de Breemsche Börgerschop. Bi de Priesverlehen för den Wettstriet „Best op Platt“ , organiseert vun de Breemsche Börgerschopp un vun’t Lännerzentrum för Nedderdüütsch, woorn Lüüd uttekent, de Platt in’t Land Bremen ünner de Lüüd brocht hebbt. 38 Lüüd un Gruppen hebbt deelnahmen und mit ehr kreative Projekten dat Plattdüütsche na vörn brocht.
To’n eersten Platz graleert wi de Plattdüütsch-AG vun’t Gymnasium Vegesack! De Jury weer vullop begeistert, wo veelfolig de Schöler*schen tosamen mit AG-Leidersche Elke Boggasch Platt an’e School sichtbor maakt hebbt.
Den tweten Platz hett de Nedderdüütsche Bühn „Waterkant“ in Bremerhoben mit ehre Platt-Verschoon vun Dürrenmatts „Die Physiker“ afrüümt. Un op Platz dree sünd de Grundscholen Schönebeck un Arsten för ehr grootoordig Engagement lannt. Allerbest!
Ok mit dorbi bi de Priesverlehen weren Antje Grotheer, Präsidentsche vun de Breemsche Börgerschop, un LzN-Geschäftsföhrer Thorsten Börnsen. Se hebbt düütlich maakt, wo wichtig dat Engagement vun all, de mitmaakt hebbt, för dat Plattdüütsche in Bremen is.
Fotos: Sven Tödter